اعتذار أخير لن يتكرر _ إن شاء الله

كنت قد قررت ألا أتكلم عن نفسي أو مشاكلي أو مشاكل المدونة أبدا فليس لهذا أكتب

ولكن

أخلفت الوعد في ساعات غضب وقد كان ما كان

وعلي هذا فقد تقرر مايلي ::

ومن فضلكم أرجو قراءة الموضوع لنهايته لفهم الأمر ككل

وعدم التعليق علي عدة أسطر غضبة ساخرة متهكمة وترك ماهو أهم

أولا :

أعلن احترامي وحبي وتقديري لكافة الاخوة السلفيين سواء العاملين منهم بالفضائيات أوغيرهم

اتفقنا أو اختلفنا ليس هذا هو المكان للمناقشة ولكن لهم مالا أستطيع أنكاره ولا أتتبع ماعليهم فأنا أقل من هذا والدعوة تحتاج لمن يدفعها لا من يعطلها

كما أعلن احترامي وحبي وتقديري للإخوان جميعهم

وأيضا لا أنكر ما فعلوه للدعوة علي مدار سنوات طويلة
ومن أدراني أنهم تراخو

قد يكونوا يعملون في الخفاء

الله أعلم بعباده

وأعلن تقديري لكل المدافعين والمهتمين بقضايا الشأن الإسلامي

ولست أقصد ما كتبت من صب اللعنات علي رؤوسهم

ثانيا :

هذا ليس تراجعا

هذا رأيي الشخصي في خلاف هؤلاء الثلاثة

موضوع اللعنات وان كانت لا تصح إلا أنها صدرت في ساعة غضب

ظهر الأمر جليا للعيان

الجدار يبني علي قدم وساق وما حدث في الأيام السابقة لم يكن سوي جس نبض وحسب

وحين سكت وانشغل كل من أنزلت عليهم لعناتي أدعوا أمر اطلاق الرصاص

وقاموا بإنزال حراسات خاصة وحمايات خاصة لحماية جدار غزة العازل

والجدع يقرب

وعلي فكرة احنا لسه ساكتين برضه

الاخوة اللي ردوا كلهم اعترضوا ع الاسلوب

لكن محدش جاب سيرة الموضوع لا من بعيد ولا من قريب ولا حتي علي مدوناتهم الشخصية وميعملوش نفس الخطأ اللي أنا عملته ولا أي شئ خالص خالص وحاسس إن أنا لوحدي اللي مأزم الموضوع مع إنه عادي عند ناس كتير

ثالثا :

من التعليقات اللي وصلت من الاخوة سواء علي البريد الشخصي او علي المدونة هما كلهم شكروا غيرتي واهتمامي بالموضوع وربنا يوفقك انت ودوس واحنا هنشجعك

وانا والله مش زعلان من اي حد خالص وزي ما قلت في الدعوات الرفض لا يوجد فيه اي حرج علي الاطلاق

ولكن لما لم أجد أي تحرك من أي من المتابعين سواء معايا او مع غيري أو مع اي حد خالص

وكلنا واقفين لما يبقي يتبني نبقي نفكر

وبما ان فكرة المدونة مش مبنية اصلا علي خطوات لوقف وهدم الجدار

وبما ان موضوع الجدار الجديد غطي علي كل الكلام اللي انا كتبته فخلاص

انا مكمل في طريقي زي مانا

اللي حابب يشارك يشارك واللي حابب يراقب برضه كتر خيره

واللي هيشتم زي ناس بعتت ع الميل برضه براحته

لكن لما يقعد واحد زي احمد موسي علي القاهرة اليوم اللي دخلت بيوت كتير بفعل الوصلات الرخيصة يقول ان الانفاق لازم تتقفل لانه بيتهرب منها سلاح وسلاح وسلاح وسلاح ومتفجرات وطول الفترة اللي فاتت مفيش حاجة بتعدي غير السلاح للدرجة اللي مش عارفين يودوه فين وعايزين بقي نعمل حرب عشان نصرفه وان في ارهابيين فجروا الحسين والزيتون وهربوا علي غزة واصلا اتدربوا وخدوا السلاح وهما خارجين ولما يتحول الموضوع خلاص نحاصر كل حاجة ونسيب الاكل والشرب ويتحكموا في ارزاق الناس ولما الصهاينة يضربوا تاني محدش يرد عليهم وذنبهم ايه الناس اللي مات منهم الفين في الحرب في الوقت اللي حماس مات منهم 16 وهكذا شد وجذب وخد وهات وحورات وتقاطعات وعمالين يقولوا راي ويرجعوا يخالفوه لحد لما الكل اتلخبط ومحدش عارف فيه ايه اصلا

وبرضه الكل ساكت

محدش بيقول يا مسلمين دول حقهم ندخلهم كل حاجة من المنافذ الشرعية

واصبحنا بنتنناقش مش في حقنا

لا

في اقل بكتيييييييييييير جدا من حقنا

فانا فعلا مش اسف لاي حد اعترض علي اني نزلت اللعنات علي كل واحد بيبرر قتل الفلسطينيين وخنقهم بالبطئ

- وان كنت مش هبطل افضحهم كلهم واشهد عليهم خلق ربنا ليوم القيامة -

والتدليس علي المجاهدين في حماس

او انه مش ذنب الشعب ده ذنب حماس

وانهم بيصوروا للناس العادية ان حماس مش من الشعب

فاكرين كل الناس زيهم

بيصيفوا في بورتو مارينا وراكبين احلي عربيات

وعايشين في افخم اماكن

والعيشة موز موز

الكلام مش علي عمرو اديب لوحده انما علي جوقة الحكومة اللي بتبرر اللي بيتعملوبعض المرتزقة اللي بيصوروا الموضوع علي أنه عادي جدا وانه حقنا وحدودنا وامننا القومي

رابعا :

وده الاهم

اتمني اني اكون وضحت وجهة نظري للي اعترض علي جملتين وساب الكلام الاصلي للمدونة والفكرة والتأريخ والمذبحة والذكري وخلافه

يا اخوانا

الجدار جزء من كل

مشكلة وقتية

بس عادي جدا

قدر الله ممكن يقوموا بحملة تاني اشد من بتاعة السنة اللي فاتتت وساعتها هيبقي هو ده واجب الوقت مش موضوع الجدار او حتي اي موضوع تاني

ده جزء من كل هنناقشه وسط اللي هنتكلم فيه

ان شاء الله

هنعمله جزء كامل لوحده في المدونة

وعلي هذا

قررت مايلي

1

أي أفكار جديدة لن يتم طرحها للمناقشة والمشاركة من الجميع وخصوصا ان مش كل الناس بتفكر بنفس الاسلوب

ومش هنخلص من فكرة معارضة وهنقعد عشرين سنة نتناقش ومش هنتحرك

2

جاري العمل في المدونة الجديدة ابتداءا من 23/12/2009 بمشاركة بعض الاخوة جزاهم الله خيرا

3

جاري حذف التعليقات والدعوات اللي اتكتبت علي مدونات تانية واحرجت اصحابها وانا ماقصدش

لانهم لو رفضوا علي الملا فشكلها وحش لانه خير للكل

4

جاري ارسال اعتذارات اخيرة ونهائية لبعض من ارسلت اطلب مشورتهم ولم يردوا ولو بالشتيمة حتي

مش عجباهم الفكرة مش عاجبهم انا شخصيا مش مشكلة

5

هذه هي المرة الاخيرة التي يتم فيها ارسال دعوات او طلبات علي المدونات او غيرها

وعذرا لكل من احرجته او دخلت لمدونته لمجرد وضع تعليق او دعوة دون الاهتمام بمادة مدونته

الموضوع اكبر من مجموعة المدونين الذين اعرفهم

جاري نشر الروابط الخاصة بالمدونة في اماكن اوسع من المدونات وحسب

6

مازالت المشاركة مفتوحة ونتلقي اطلبات او المشاركات علي

gaza_notforget@yahoo.com

وانتظرونا الأيام القادمة وبكثافة

هنا

http://gazanotforget.blogspot.com/

غزة .. لن تركع .. ولن ننسي ....