في الرد علي وائل عباس _ الحلقة الأولي

من اللحظة الأولي ممكن يبهرك وتنخدع فيه ، ببساطة هو صاحب كليبات التعذيب اللي مجننة ناس كتير وبيقوا ان بي بي سي اختارته ضمن أهم شخصيات 2007 ودي مش أول مرة ، انفرادات مثيرة للجدل مش لأي انسان الا ليه هو ، المدونين من أعضاء كفاية سواء الاشتراكيين أو العلمانيين أو الشيوعيين أو حتي الملحدين كلهم بلا استثناء اتمسكوا في مظاهرات كانوا بيغطوها أو مشاركين فيها وكلهم اتبهدلوا جامد جدا الا هو كان دايما بيطلع سليم وما أعتقدش ان كونه مراسل لوكالة أجنبية يحميه كتير من تهم كتير كانت ممكن تتوجهله
الباشمهندس وائل عباس صاحب مدونة الوعي المصري اللي المفروض انه أشهر مدون مصري موجود اليومين دول زي مابيقولوا طلع علينا بتدوينة جديدة من رفح ممكن تقول كتر خيره رايح يشارك لكن اللي حصل غير كده خالص ، أولا لهجة عدائية سافلة جدا جدا وشتيمة وتجريح وقلة أدب في كل التيارات بلا استثناء – ومحدش يفهم اني بدافع عن التيارات دي كلها اعتراضي علي الشتيمة – والأغلب طبعا علي الاخوان المسلمين اللي المفروض ان حماس جزء منهم والموضوع لحد هنا عادي لأن هي دي طبيعته عموما لكن اللي مش طبيعي هو الكلام المكتوب
أنا هنا هاعلق علي كلام كتير وهارد كمان مع حذف كلمات سافلة جدا جدا اللي ممكن تقروها عنده لكن هنا لأ

أولا الصورة اللي فوق كاتب تحتها بيقول حمساوي بيأدب عساكرنا الصعايدة الفلاحين العزل من السلاح بلطجة وقلة أدب ولا لأ ؟؟؟؟ أولا مش فاهم ازاي عساكر وحرس حدود ومن غير سلاح وازاي كل دول مش قادرين علي واحد بس علي الرغم ان الواحد ده سلاحه مش في اتجاههم خالص لكن اهو كلام والسلام وبعدين مش عارف هو شاف بطاقته مكتوب عليها انه حمساوي ولا لأ قبل مايقول كده واللي هيركز حبة يلاقيهم باصين بعيد عنه اساسا يعني الخطر مش من ناحيته ، ياريت اللي شايف حاجة غير كده يقولي

الصورة التانية كاتب على الأرض كلبين مصابين وإتنين عساكر مصريين ودخان الرصاص باين ولسه باكلم واحد اخواني بيقولي ماضربوش رصاص واجهته بالصور قال لي دول مش حماس ومش عارف كل العساكر دي خايفين من واحد ولا اتنين وكمان سابةا صاحبهم مجروح وواقفين بعيد


الصورة التالتة اللي غريبة قوي بيقول انهم من حماس بيفتحوا الطريق بالقوة من ان العساكر واقفين عادي ودول تلاتة بس في حين ان في جيش واقف

واخيرا خلاص الخوف راح قلع الخوذة وساب سلاحه ومسك شومة ورايح يضربهم طب ليه معملتش كده من شوية لما ضربوا صاحبك اللي اتصاب هو والكلاب

دي كانت الصور أما الكلام ففيه العجب هو بيقول انها مش اول مرة وان حماس قتلت قبل كده 3 عساكر مصريين لما فتحوا المعبر المرة اللي فاتت

مش عارف بصراحة امتي من الواضح انه هيألف في التاريخ كمان
بعدها وجه رسالة للحمساويين بيقول انه ياما سمع عن مذابح ايلول الاسود في الأردن للاحئين الفلسطينيين ومذابح صابرا وشاتيلا في لبنان والمذابح اللي عملها حافظ الأسد برضه للاجئين في سوريا ولكن يظهر انه بسبب ( ......... ) الفلسطينية ،

علي فكرة اللي عرفناه من كتب التاريخ ان صابرا وشاتيلا عملها شارون واعتقد وائل عباس بيأيده لأن الفلسطينيين يستاهلوا
أخيرا بيقول ان الغزاوية مش محتاجين فلوس أصلا لأنهم مش شحاتين وكمان بعض الغزاوية شايفين ان ده اهانه ليهم ودي اول مرة أسمعها من اللي بشوفه في كل حته انهم بيقولوا ساعدونا ومحدش قال اننا مش محتاجين ومش عايزين منكم حاجة والكلام ده

بعدها بشوية رجع يشتم في الاخوان والقومجية واليسارجية اللي عايزهم يلموا التبرعات ويدووها لأهل امبابة والمطار وقلعة الكبش وبيعيب علي الاخوان انه مشفش واحد بس فيهم عامل مظاهرة علي غلو الاسعار ، ايوا الأسعار غالية علي الشعب كله لكن الاخوان هما اللي لازم يتظاهروا عشان يبانوا انهم متبطرين ، الناس كلها ساكتة الاهما عايزين حريقة في البلد وبالتالي يتقبض عليهم ويضربوا ويتسحلوا ويتحاكموا عسكريا المهم وائل باشا يشوفهم وهما بيتظاهروا ويصورهم وبعدين يسيبوه هو زي كل مرة

علي فكرة من كلامه واضح قوي انه من أنصار نظرية أن تحرير القدس يبدا من تحرير القاهرة وسيبك من فلسطين والعراق والدنيا كلها واحنا أهم طبعا من ده كله ومش مشكلة اننا المفروض امة واحدة مشكلتها واحدة ، لا كل واحد يحل مشاكله ، القدس مشكلة الحمساويين والفلسطينيين واحنا ملناش دعوة بيهم

في جملة تاني هو زعلان ان غزة ترتيبها 98 في تقرير الامم المتحدة للتنمية في حين ان مصر ال 120 بس وشايف ان التبرعات ماهي الا نصباية اخوانية علي المصريين الغلابة مش بس كده هو كمان نقل كلمة الدكتور محمود الزهار في حواره مع جريدة المصري اليوم بيقول فيها

وعلي الجانب الآخر فإن الخبراء عندنا يقدرون الفوائد التي ستعود علي مصر في الأسبوع الأول لفتح الحدود وحده بنحو ٤٠ مليون دولاروبالتالي فإن كانت أمريكا تهدد مصر بقطع ١٠٠ أو ٢٠٠ مليون من مساعداتها فأعتقد أن استفادة الشعب المصري خلال هذه الفترة أكبر بكثير

حد يفهمني بقي فيها ايه دي ان معاهم فلوس يعني طب وايه المشكلة انت عايزهم دايما مذلولين يمدوا اديهم لكل الناس الطبيعي انهم بتجيلهم معونات بيشتروا بيها بضايع م الصهاينة ولما حاصروهم صرفوها عندنا في مصر

ايه مشكلتك

ده ردي

لانه بيقول حد عنده رد

الناس دي بتقدم ارواحها فداء للقضية

والفلوس اقل اقل اقل حاجة ممكن تقدمهالم ياعم الصحفي النشيط

وأخيرا قبل الختام ببساطة كل اللي هيشتم يبقي اخواني منافق مدعي عفة اللسان عايز يبينه بيشتم الفلسطينيين في حين انه بيشتم حماس صنيعة الموساد اللي الفلسطينيين شافوا أسود أيامهم في عهدها ، الباشمهندس وائل عباس شايف ان حماس أسسها الصهاينة اللي دعموا الشيخ ياسين عشان يكونوا عقبة في طريق المناضل الكبير – العميل ياسر عرفات –
وطبعا التعليقات اغلبها ايده في كل كلمة وسبوا حماس والفلسطينيين والقضية كلها والواضح انهم من نوعية البشر اللي عايز يتخلص من عبء الدفاع عن القضية فبيخلق لنفسه أعذار وهمية من نوعية ان هما اللي باعوا الأرض ويستاهلوا
الخلاصة
توقفوا عن دعم حماس وبطلوا تتبرعوا ليهم ، وهما ارهابيين وقتلة جايين يضربونا في بلادنا اللي فتحناها ليهم ع البحري

انا بصراحة لو هاتكلم واعلق واكتب كلامي هيطول قوي عشان كده أنا هاقف هنا لان الموضوع كده هيطول زيادة عن اللزوم والناس بتزهأ بسرعة لكن هاكمل خلال يومين ان شاء الله
اللي عايز يعرف تفاصيل اكتر
وليه بهاجم وائل عباس بالذات رغم انه مش اول ولا آخر واحد يهاجم حماس
تابعوا الحلقة التانية خلال يومين
وادعوا لي ان النت ميقطعش
اللي عايز يكمل تدوينته ممكن يقراها هنا

http://misrdigital.blogspirit.com/archive/2008/01/29/no-to-hamasan-bullying.html#comments

لاتنسوني من دعائكم

وتذكروا اخوانا في العراق وتحديدا في الفلوجة والموصل من دعائكم فهم في كرب عظيم