عائد من الحرب

السلام عليكم ورحمة الله وبركاته
انا رجعت من الحرب ياجدعان - الامتحانات يعني – وبفضل ربنا عليا رجعت سالم غانم منتصر لكن كالعادة كل حرب ولازم فيها خسائر ولو بسيطة عموما مش مهم المهم اني رجعت تاني لارض الحرب عشان نحارب بجد مش مجرد حرب علي الورق

في البداية احب اشكر كل واحد افتكرني بدعواته اثناء الامتحانات
بس عندي خبر تاني مهم هو اني قررت الغي موضوع المجلة
هو الحكاية كلها اني من وقت للتاني باكتب حاجات خفيفة كده ملهاش علاقة بارض الحرب يعني قصص واشعار وخواطر وكنت ناوي اعمل مدونة للحاجات دي بس تكون مستقلة بذاتها لكن بصراحة شلت الموضوع من دماغي لاسباب مش هينفع اقولها دلوقتي

عموما انا قررت انشر الحاجات دي في المدونة هنا من وقت للتاني
من باب روحوا عن القلوب ساعة بعد ساعة فان القلوب تمل والحياة مش كلها حرب يعني
وكنوع من اني اريح الناس مني شويتين والحاجات دي هتشوفوها علي فترات في المدونة وان شاء الله تعجبكم

التاج علينا حق

مكنتش متخيل ان في مدون هيمرر لي تاج حتي لما كنت باقرا تاجات عند ناس تانية مكنتش باهتم باني اشوف هما هيمرروا التاج ده لمين لاني كنت متاكد اني مش منهم لان انا اساسا عارف ان زوار المدونة ميكملوش خماشر بني ادم لكن اول مارجعت للكومبيوتر اذ افاجا ان في تاج جالي من مدونة صديقة ساعتها والله فرحت جدا لما لقيت ان في بني ادم - بني ادمه – بدا يتابع بجد اللي بكتبه وعشان كده قررت ان اول حاجة هاضيفها هي التاج

ملحوظة صغيرة
مش عايزين حد يضحك ولايتريق علشان منخسرش بعضينا
انا بقولكوا من اولها اهو
@@@@@@@@@@@@

من هو:أحب شخص لقلبك في الدنيا ؟

بعد النبي عليه الصلاة والسلام بحب كل واحد بيقول لا اله الا الله محمد رسول الله

انسان مستعد تضحي بحياتك – ركز في كلمة حياتك علشانه ؟

سؤال صعب لو كان النبي عايش كنت رديت من غير تردد
اما دلوقتي يعني ممكن اقول امي وابويا

اسم أول حب؟
امي وابويا وخااااااالي اللي دلوني علي طريق ربنا

اسم اخر حب(حتى الان)؟

المسلمين في ارض الحرب بوجه عام

ما هو :اسم أجمل كتاب كتبه بشر قرأته ومحتفظ به حتى الان ؟

انا بصراحة قريت كتب ملهاش اول من اخر لكن محتفظ دي صعبة شوية لكن ممكن اقولكم شوية حاجات منها مثلا

الخالدون مائة اعظمهم محمد
سير اعلام النبلاء
الفوائد لابن القيم
مؤلفات الشيخ احمد ديدات
ساحر الصحراء باولو كويلهو
ايات الرحمن في جهاد الافغان للشيخ عبد الله عزام
رجال حول الرسول
احياء علوم الدين

عندي كتاب تحفة اسمه
مذكرات الدكتور الشهيد عبد العزيز الرنتيسي


اسم كتاب-كتبه بشر برضة- انت متعلق بيه وبتقرأه كل فترة؟

مش عارف بقي لو كنتوا سمعتوا عن الدكتور خالد ابوشادي ولا لأ
هو لي 3 كتب انا مليش غني عنهم ابدا

سباق نحو الجنان
صفقات رابحة
رحلة البحث عن اليقين

وفي قصة للدكتور نبيل فاروق اسمها الموت لا ياتي مرتين

اهم جهاز منزلى انت متعلق بيه او بتستخدمه كتير ؟

الكومبورتر طبعا

شئ تحس بالراحة النفسية عندما تنظر اليه ؟

صورة المسجد الاقصي والكعبة

مكان تحس فيه بالحنين الي شئ لاتدري ماهو وذكريات جارفة الي لاشئ ؟

لما بقف ع النيل ولما باعدي من ادام مدرستي القديمة
ايييييييييييييييييييييييييييه

كانت ايام

مكان تحس بالراحة عندما تدخله ؟
المسجد اساسي بعديه المكتبة وسط الورق والمجلدات وكده يعني

اجمل مدينة زرتها داخل مصر ؟

والله انا مخرجتش بره منطقتي كتير
لكن لو السؤال اجمل مدينة شفتها في احلامك او حتي احلام اليقظة ممكن اقول
القدس القديمة وبغداد قبل الغزو


أجمل مكان طبيعي رأيته داخل مصر؟
منظر النيل لحظة الغروب

نوع هاتفك المحمول ؟
بصراحة معنديش لاني مش محتاجه اساسا

كفاية الكومبروتر عليا
باعرف اصرف اموري من غيره

سرعة بروسيسور جهازك ؟
معنديش فكرة اهو شغال مبيقولش لا

حجم ذاكره-هارد جهازك ؟
ثمانوووووووووووووووووون


المساحة التى تشغلها المواد الاسلامية على جهازك ؟
ثلاثة وخمسسسسسسسسسسسسسسسسسسسسسسسسسسسسسون


نفس المساحة السالف ذكرها فى قلبك-الاجابة لنفسك عشان الرياء يا اخواننا ؟

لا طبعا الجهاز شرك مع اخواتي عشان كده المساحة محدودة اما قلبي ده بتاعي النص اليمين فيه الاسلام والنص التاني فيه ارض الحرب بكل مافيها ومن فيها


اهم هدف انت واضعه لحياتك دلوقتي ؟
اخلص الدراسة بتقدير كويس عشان الواحد يستريح مستقبلا بعد كده ويتفرغ باه لارض الحرب


مواصفات فتاة –أو فتى للبنات- الأحلام بالنسبة لك ؟

والله هو فيه صفتين اساسيتين عشانها هي والله مش عشاني
الاولي تكون علي قدر معقول جدا من التدين والارتباط مع ربنا
التانية انها تكون مجنونة رسمي او علي الاقل عندها ربع ضارب لاني

متا كد ان مفيش بني ادمة عندها ذرة عقل تقبل ترتبط بواحد بيعمل اللي انا باعمله طول النهار والليل

صف ما يأتى :شعورك لما بتسمع كلمة مصر؟

شعورين

الاول شعور عميييييييييييييق بالغربة

التاني باقعد افتكر مصر اللي خرج منها صلاح الدين الايوبي وقطز عشان يحموا الاسلام والمسلمين وبحلم باليوم ده تاني بس بدل صلاح الدين وقطز يكون العبد لله علي راس الجيوش

الي الجهاااااااااااااد


شعورك لما بتسمع كلام عن اليهود ؟

قسما

ساثار لكن

لرب ودين


شعورك لما بتشوف ظابط شرطة ؟
شعور بالشفقة
الناس دي هتقول لربنا ايه يوم القيامة لما يسالها


شعورك لما بتشوف الكناس العجوز فى الطريق ؟
الحمد لله علي نعمه التي لاتنقطع

لون البطانية اللى بتتغطى بيها فى الشتاء ؟
مش عارف ايه لزمة السؤال

بس عموما

اخضر


لون الجورب-الشراب- المفضل لديك ؟
ولا عارف كمان ايه لزمة ده

بس برضه عموما

اسود


احساسك اذا داست قدمك علي مخلفات اخراج حيوان *** - ولامؤاخذة- ؟

ولو انها مقرفة
بس بافتكر كلمة النبي فيما معناه
عجبا لامر المؤمن امره كله له خير حتي الشوكة يشاكها يغفر الله له بها خطيئة
او كما قال سيد ولد ادم

@ ماتصلوا عليه @

انا همرر التاج ده ل 3 مدونين بس مش عارف بقي اذا كان التاج هيوصلهم ويردوا عليه ولا كالعادة مش هلاقي صدي او رد للي كتبته مين عارف

انا عموما لقيت التاج عند ناس كتيييييييييييييييييير

لكن عموما انا هامرر التاج ل

عصفور المدينة
رنين الصمت
حائر في دنيا الله
علا من غزةامام الجيل

امام الجيل

يحيي بن زكريا